ప్రస్తుతం ఇలియానా నటిస్తున్నది ‘3 ఇడియట్స్’ తమిళ వెర్షన్. ఐదేళ్ల తర్వాత మళ్లీ తమిళ చిత్రం చేస్తుండటం థ్రిల్‌గా ఉందని ఆమె అంటున్నారు. ‘కేడి’ చేస్తున్నప్పుడు తమిళ భాషపై కొంచెం పట్టు కుదిరిందట. అయితే ఈ ఐదేళ్లల్లో తమిళ సినిమాలు చేయలేదు కాబట్టి మళ్లీ కొత్తగా తమిళ పాఠాలు మొదలుపెట్టానని ఇలియానా అంటున్నారు. ‘3 ఇడియట్స్’ కోసం ఈ బ్యూటీ పెళ్లి కూతురి గెటప్‌కి సంబంధించిన సన్నివేశాలను చిత్రీకరించారట. ఈ సీన్ పూర్తయిన తర్వాత ‘బాగా యాక్ట్ చేశావ్’ అని ఇలియానాను శంకర్ అభినందించారట.
అంత పెద్ద దర్శకుడి అభినందనలు అందుకున్నందుకు ఆమె ఆనందం వ్యక్తం చేస్తున్నారు. ఈ ఏడాది ఇలియానా తెలుగు, తమిళ భాషలతో పాటు హిందీ తెరపై కూడా కనిపించబోతున్నారు. హిందీలో ఆమె ‘బర్ఫీ’ అనే చిత్రంలో నటించడానికి అంగీకరించిన విషయం తెలిసిందే. ఈ చిత్రం షూటింగ్ ఆరంభం కావడానికి మరికొంత సమయం పడుతుందట. తెలుగులో తను నటించిన ‘నేను నా రాక్షసి’ విడుదలకు సిద్ధమవుతోంది.
